We MoVed!

This blog moved to blogspot. find it here: 3a Fikra

http://hadiaridi.blogspot.com/

بابا نوال سلّملي عالإستقلال

لمّن كنا ولاد زغار

 كناّ نصدّق إنو في شي إسمو بابا نويل

santa claus أيّ

ومننطروا من سنة ل سنة

 تا بجي عَ عيد الميلاد

.ونعملّو فرحة

وكنّا لازم نكون شاطرين ونسمع الكلمة كرمال ما يزعل منّا حضرة جنابو

!ويبطّل يزورنا عالعيد

وكبرنا، وفجأة إكتشفنا إنو قصة بابا نويل مش مظبوطة

وإنو أصلاً بابا نويل مش موجود

وصرنا نحنا نعمل حالنا بابا نويلات  ونروح لعند الأولاد

هنّي فرحانين فينا … ونحا مبسوطبن فيهن

___ ___ ___ 

 

،المهم

بلبنان في شي متل بابا نويل

مش موجود

بس الناس كلّا مصدقة إنو موجود

ومبسوطين في

..هيدا هو الإستقلال

بيجي مرّة بالسنة

عا عيد الإسقلال

وكل الناس بتعطّل أشغالا

كرمال تتفرّج عليه

…لَ تعرف كيف بيكون

بيطلعوا الزعما، وبيعملوا خطابات

 وبيخلّوا العالم يحسّوا إنّو عنجد الإستقلال موجود

 

والناس- كرمال يحافظوا على الإستقلال- لازم يسمعوا كلمة الزعما

“وصاروا متل ال “غاشي وماشي

 عم يهيصوا للزعما

ولل إستقلال

ومصّدقين ومبسوطين بحالن إنّو عندن إستقلال

ناسيين إنو يلّي عنجد حاكم هل بلد

 مش من هل بلد – يعني بعكس فكرة الإستقلال

هنّي  ال سين-سين ، وأميركا وإيران وإسرائيل ، وحوالي عشرين دولة زيادة، عم يتسلّوا فيهن.. وبالبلد .. وبالإستقلال

 

….

يعني، ما بعرف أيّا نهار

 رح تكبر عقول هالناس

ويصيروا يعرفوا إنو ببلدنا

ما في  شي إسمو إستقلال

وإنّو حتى لو ما سمعوا كلمة الزعما، عمّو “ الإسقلال” ما بيزعل منّن – لأنو أصلا مش موجود لَ يزعل

وبركي، وقتا هنّي -الناس- بيعملوا الإسقلال عنجدّ

!وبيخلصونا من هل كذبة

________________________

…وعشتم وعاش لبنان-موطناً عربياً مستغَلاً

Deliveryإجا الحلّ بالـ

،من كم يوم

أنا وعم شوف الجريدة متل عادتي كل يوم

 بتفاجأ بخبر مش عادي

خبرية عن خدمة جديدة: من الدولة للشعب

(تحديداّ لَ هيدا الشعب المضروب عا راسو)

….

 : هيدا المقال بيحكي عن خطة عملتا وزارة الداخلية لتقليص حوادث السير، ومن جملتو

 ”..رادارات متطورة سوف تضبط مخالفات السرعة، من دون تدخل مباشر، ثم يُرسل الضبط إلى عنوان إقامة المُخالف…”

هيدي الخبرية عجبتني وفاجأتني

 ..

هلأ بطبيعة الحال، كل الناس شايفينا خبرية عادية وطبيعية

 إنو عال يا جماعة، بلّشنا نطوّر بـ هل بلد

 وصرنا نحط مكنات بدل حواجز السرعة المتنقلة (خصوصاً هيدي الحواجز البتكون بنصّ دين الكوع وعلى الأوتستراد -أيّ يليّ بتروّح ضحايا) إيه

هيدي الشغلة كتير منيحة – وبديعة كمان

 ..

 :الشي يلي لفتني إنو

 ويرسل الضبط الى عنوان إقامة المخالف”

… هون ما عدت ذاكر شو حسّيت تحديدا”

(بتخيّل إنو كان شي متل “كوكتيل أحاسيس”: فرح وغضب وتفجّع وإبتهاج – يعني من جميعو)

:فكرت..قلت خيّ.. رح نضرب حجرين بعصفور واحد

( ما ضروري تتزاكوا – بعرف إنو المثل بالعكس)

أولا: منكون خفّفنا من مشاكل السرعة وحوادث السير

!بس تانيا (وهون الشي الأهم): بتكون الدولة عملت الحلّ الجذري للبطالة بلبنان

 ساعتا سحبت كل جملة قلتها بالماضي عن الدولة كيف آخر هما الشعب)

 (لأنو هيدا الشي أثبت العكس

..

هلأ بطبيعة الحال عم تتسائلوا: العما كيف طلعت معو هيدي قصة البطالة؟

..بسيطة، خليكن معي شوي بعرفوا ليش

 المفروض إنو هيدا الضبط -إذا متل ما ناويين الشبيبة يعملوا فيه- بيوصل عالبيت

 يعني: متل ما البيتزا بتجي دليفري، بيصير الضبط كمان يشرّفنا دليفري

 وهون بيت القصيد

 (“حلوة هيدي “بيت القصيد)

 بما إنّو عم يوصل صاحبنا(أي الضبط) دليفري، يعني بطبيعة الحال في حدا عم بِ وصلّنا ياه

 (إيه إنّو تخيلوا ضبط عم يكسدر وحدو)

 ولذلك، بتكون الدولة خلقة فرصة عمل لَ مواطن لبناني

 كان عاطل عن العمل، وفجأة صار بيشتغل بالدولة برتبة “ديليفري ضبوطة” .. ه

،إيه

 وإستنادا للبند 23452 من الدستور، يلي بيقول : ذنب الكلب أعوج، وما بيجلس قد ما تحاول تجلّس فيه

 فَ بطبيعة الحال

 ما رح يبطّل اللبناني السرعة

 يمكن لأنو هيدي الإشيا موجودة بالـ)

DNA

(تبعنا – نحنا كَ فينيقيين يعني

 لذلك، بتصير الدولة بطلب مستمر لموظفين “ديليفري ضبوطة” ه

،وبيضلّوا يزيدوا هل موظفين

 وبيصير يطلعلن نواب بالبرلمان متلن متل باقي الطوايف بهل بلد

 !وساعتا هنّي كمان (أي النواب الجداد) بيبلشوا يفتشوا عا حلّ لمشكلة السير والسرعة

 _________

!مش فكرة؟